Қазақстан медицинасы мен ғылыми қауымдастығы ауыр қазаға ұшырады. 2026 жылы 9 қаңтарда 81 жасқа қараған шағында саналы ғұмырын адам жанының арашасы болуға арнаған ардақты дәрігер, ұлағатты ұстаз, медицина ғылымдарының кандидаты, доцент Тұяқ Момынұлы Әбиев дүниеден озды.
Тұяқ Момынұлы 1945 жылы өмір есігін ашып, бар ғұмырын дәрігерлік қызметке арнауды мұрат тұтты. 1969 жылы Қарағанды мемлекеттік медицина институтын бітіргеннен кейін, еңбек жолын Кеңес Армиясы қатарында бастап, кейіннен қарапайым травматолог-дәрігерден бастап, ғылым кандидаттығына дейінгі даңғыл жолдан өтті.
Ол өз ісінің нағыз майталманы еді. Мәскеу қаласындағы Н.Н. Приоров атындағы беделді институтта аспирантурада білім жетілдіріп, күрделі оталарды жасау әдістерін зерттеді. Оның қаламынан туған 60-тан астам ғылыми еңбек пен медицина саласына енгізген жаңашыл өнертабысы – болашақ ұрпаққа қалдырған баға жетпес мұрасы.
Тұяқ Момынұлы тек білікті маман ғана емес, сонымен қатар жүздеген шәкірт тәрбиелеген қамқор ұстаз болды. Жалпы хирургия және травматология кафедрасының доценті ретінде ол жас мамандарға дәрігерлік өнердің қыр-сырын үйретіп, олардың бойына ізгілік дәнін екті.
Академик Н.Ж.Батпенов атындағы травматология және ортопедия орталығы марқұмның отбасына, туған-туыстары мен жақындарына қайғыра көңіл айтады.
